August 1, 2009

• 史兄給會考生的話 (教育版)

  放榜在即，史兄跟會考同學們有話說，我替他剪輯了一個教育版（因為本網誌屬I級教育網站，所以唔敢提供原文連結，亦希望hkblog唔好引用）：

  
  

  <放榜二三事> 八月頭. 又到莘莘學子會考收成之時. 放心, 我唔會教你搵學校呀, 做乜野心理準備呀 個類野. 呢d 野你係報攤用 $8 買本便利就有. 再者, 我根本唔識呢d 野... 大佬, 對我黎講會考已經係成十二三年前既事, 當年我中文仲有範文, 要讀 弔古戰場文. 呢篇文我睇都未睇過; 仲有個篇乜野 聽陳蕾士的琴箏 (琴箏? 我記得好似叫 琴音 定 琴乃... 有關文章 1, 文章 2), 作者真係令人費解. 這些年來, 這兩篇文害了多少莘莘學子？（kursk按：早兩年取消範文的時候，有記者訪問作者，作者話考評局選中佢個作品佢都冇理過，不過令莘莘學子吃苦佢都覺得唔好意思咁話） 話分兩頭, 放榜無乜好擔心, 皆因個日令好多同學心想事成. 其實返左十幾年學, 你日日都唔想返; 你唔想再對住個個你唔想見到既阿sir同miss. 學校好遠, 大拿拿係石硤尾 - 但你住深水埗 - 唔想返. 偏偏唔想返又返左十幾年 - 人生就充滿黑色幽默 - 你放榜個日終於得到機會, 一次過達成幾個願望. 唔使再讀書既大門係個日為你而開! 相起你入飛抽金隅, 唔使再讀書既金隅中籤率就更高... 畢竟七萬人讀中五, 就只有兩萬五千人升到中六, 即係中籤率有成 65%!!! 問題係, 好似你同拍左六七年拖既女友一樣. 你對佢已經對到超越左厭既地步; 你係 apathetic, indifferent, even don't give a damn care to her. 好可悲. 可惜到真係要分手, 你多多少少都會唔捨得, 唔開心. 有幾唔開心, 就睇下你份人有幾賤... 你問我, 中五會考放榜, 最慘係乜. 我會答你, 你將會無左同一班好朋友繼續長時間相處既機會. 除非你讀名校, 一班 40 人個個都30 分升返原校 - 可惜, 個人認為係競爭咁劇烈既地方, 明爭暗鬥, 只會爾虞我詐. 順帶一提, 當年我曾目睹有人將 "爾虞我詐" 寫作 "爾愚我炸". 好一句你既蠢, 激到我爆炸. 乜野材女個d 錯字, 濕濕碎拉. 再順帶一提, 你讀名校的話, 其實人生充滿諷刺. 我聽過會考有人 27 分 - 即 5A1D 或 4A1B1C 或 3A3B 或 2A4B1E (如此類推) - 唔能夠係原校升讀. 太過分了! 世間竟有如此荒謬的事情. 若然有 3 數個咁既人黎到我中學, 可能己是全班 40 人分數的總和... 當然更大可能係佢地黎到會俾人打... (kursk按: 27分升唔番原校應該只係少數個別例子。另外，2A4B其實只得26分) 每逢我見到d 幾十分仲要唔開心個d 人, 我就諗起朱門酒肉臭, 路有凍死骨. ----------------- 但若果你好似我咁好彩, 係一部普普通通既中學讀書, 放榜個日, 你升唔升到中六, 都會無左六七成朋友. 這是會考唯一的失敗之處. 大家係個一日後都會各散東西 - 有的到別校讀預科, 有的原校重讀, 有的投身社會, 有的從此成為失蹤人口. 這是痛苦的. 可能這和拉下扣板後射出的子彈一樣, 不能回頭, 也無法避免. 你當年並不知道, 畢竟放榜當天大家都會只顧自己的成績及出路. 報中六, 計分數然後四出找學校, 叩門求人家讓你重讀. 不是你不在意友人, 只是在這天, 你忽爾會有種生死存亡的感覺, 是自己的生與死. 那一天你會看見很多人和事 - 開心, 落淚, 驚慌, 失望, 徬徨, 抱頭痛哭, 振臂高呼, 但就像錄影帶快鏡一樣, 你不記得半點, 也沒有理會得那么多. 你只能在意自己. 許多年後, 你才會發覺當天是你人生的一個重要轉捩點. 朋友, 沒有了. 就像集齊七龍珠後向神龍許願, 龍珠會飛向四方. 好運的話, 你可以及時拾回四星珠, 往後的日子與一兩個你人生中最好的朋友繼續密切地來往. 餘下的許多許多從此會在你人生中消失. 徹底消失. 開首時, 大家暑假後仍會有聚會, 互相更新情況. 當大家有了新的生活後 - 小勤到旺角兆萬當 sales, 大飛原校重讀中五, 一強被迫到澳洲留學 - 你們開始變得陌生, 生疏. 我是幸運的. 即使中五後與大部份好友分離, 多年後大家也一路有見面, 聯絡; 大時大節也會一起慶祝. 但我仍然記得有三數年, 我很少找他們; 重逢後, 也花了不少氣力才能再次熟絡. 預科那兩年是地獄. 只可以讀書, 也只顧讀書. 讀書是為了升大學; 不想升大學, 不用讀預科. 若然你沒有那種運氣可以讀大學時瘋狂一番, 會考代表你人生快樂時光的終結. 讀書上學是最快樂的, 不可能反對. 時間越久, 我越肯定這種感覺. 什么也有人安排好, 你只需在課堂上睡覺, 然後準時出席考試. 不用理會太多東西, 只需要理會自己喜愛的事情. 這樣快活生活你人生不會有太多. (kursk按：所以，世上最辛苦既事，莫過於同時要返工，又要讀書) 曾經身在福中, 可惜一切已經太遲了. Eventually we come to know and understand a lot of things, but it's too late because a whole life has already been determined.  Though, being early does not mean that you will or can make any change. ----------------- （Kursk按：中間呢部份skip了。因為史兄的放榜童年回憶好難改，唔改了，跳到會考生既出路同社會經濟現象分析） ----------------- 現在的中五畢業生, 好慘. 慘, 不在於你零分. 你拎零分, 見到張 cert 肯定會哈哈大笑. 邊度慘? 慘, 在於你唯一既出路, 係要繼續讀書. 但你明明唔想讀書. 零分不就是最好的證明? 因為, 你根本無得唔讀. 我那個年代, 中五畢業, 還有一些學歷要求較低, 專業技術要求較高的工作. 廚師, 汽車維修, 髮型師. 專心地做好這些工作, 當年還有機會出頭. 但今天, 賣寬頻也要大學畢業. 很多工作, 不是給年過四十的人霸住, 就係已經外判晒返大陸. 政府搞什么副學士, 你不讀的話, 無得爭 - 儘管副學士和八萬五一樣, 根本是一個泡沫. 泡沫的恐怖之處, 不在於它的假大空, 而是在於你不跟著做不行. 再加上今天一街也是那些借錢唔還錢既大學生. 做乜都要讀書, 我看就快連做速遞也快要先考地圖課. 時代變了. 好 了, 你要當廚, 也要當個出色的廚. 要做米芝蓮餐廳的大廚 : 到最後你還是要識字. 識字讓你可以去法國瑞士學廚. 識字讓你與外國客人溝通. 識字讓你可以拋書包. 剪頭髮要在中環替洋人剪 : 替我剪頭髮的傢伙說, 他當年在中環做小師傅, 懂說兩句英語, 客人 - 不論是 ABC 還是真洋人 - 就會給 $100, $200 貼士. 維修汽車要維修寶馬, AUDI, 法拉利. 那厚厚的說明書, 也是英文, 也是一堆堆的努力. 不是你不讀就死路一條. 問題是, 機會不多, 你要花很大的努力, 才能有丁點的回報. 將那些努力放在會考上, 你可能考到 30 分, 40 分, 100 分. 信我, 會考不講求天份. 讀書根本不講求天份 - 只有搞學術搞藝術才講求天份. 你只要肯努力死讀死背死溫死哽死睇死背, 成績就不會太差. 即使未必夠你升中六 - 畢竟有人連 26 分都要搵學校 - 但夠你讀其他職業類學校. 忘記什么展翅計劃吧! 只有傻的才信政府說展翅畢業 = 會考五科合格. 你要真正地五科合格, 請鼓起勇氣, 堂堂正正地讀書溫習, 去考會考. 只有會考五科合格, 才是真正的五科合格. 別信那些 A 貨. 趁還沒有放榜, 邀請幾個同學去街吧.

  （上文不代表本blog立場）

  --------------------------------------------------------------

  同場加映：週六晚上推好音樂

  在holys那裡看到的。 Coldplay的Yellow是我其中一首favourites，這個女聲版我更喜歡。

  .

  • 10:42 am
  • 16 Comments