[香港土地政策ABC]
1. 李兆基提免補地價農地建樓
香港全部地都係官地，都係有地契規定用途。農地用途要轉住宅用途，就要向地政署申請。
要起住宅，除咗要改地契用途之外，仲要改埋地積比率條款，所謂地積比率，即係起出嚟嘅樓面面積可以係塊地嘅面積嘅幾多倍。農地地契通常都係唔可以起樓，換言之地積比率係0，而四叔講嘅「環頭環尾」農地所在位置，如果參考古洞發展區嘅地積比率，係2到3倍，代表可以起塊地面積2至3倍嘅樓面面積。因為咁，所以住宅用地嘅地價高過農地好多好多。
要將農地地契改做住宅地契，就要補番住宅用地同農業用地嘅地價差額。雖然政府補地價都係明益大地產商，但點都要俾一筆唔小嘅數目。
好多大地產商向農地業主買入農地嘅時候，至多係以農地價值加些少hope value上去，因為之後發展住宅仲要補地價。如果政府俾你大地產商農地免補地價發展住宅，即係送幾百億俾佢地駛。如果咁都得，不如將啲官地攞出嚟免費送俾地產商啦。
仲有，免補地價你就會賣平啲，唔好玩啦，到時你咪又係扮豪宅賣一兩萬蚊一呎。
2. 蔡涯棉：李兆基建議好吸引
說時遲，那時快，四叔講完第二日，貴為梁政府土地政策智囊嘅蔡涯棉又好有默契咁幫政府試沙煲。如果李兆基真係咁好心，又唔想俾人鬧官商勾結嘅話，可考慮以農地價格賣番啲地俾政府起樓。
如果可以唔駛補地價改地契起住宅，其實係破壞百幾年嚟嘅遊戲規則，明送錢俾地產商。不如咁啦，下次阿四叔擺滿月酒，直接叫庫房埋單咪得囉，一樣係全香港人埋單之嘛。
Recent Comments