April 15, 2013

  • 劉德華冇資格選特首?


    (圖片來源：辛浩仁@FB)

     

    第1，講嘢呢個人，而我不知道他是誰，唔好話我，呢張相出現響FB嘅時候，好多人都問佢係邊個，聽講原來係立法會議員*，說明小圈子選舉幾有認受性。

    第2，「沒什麼經驗、人緣好、曝光率高」，如果有足夠選民認為佢適合，點解唔可以選？咁只有響行政會議開會嘅經驗、人緣奇差嘅人，點解可以選？

    第3，劉德華選有咩問題？個問題係你個機制係咪真正俾真正有普遍民意基礎嘅人選。列根本來都只係個過氣二線男星，參與政黨一段日子之後去選州長，卒之佢做咗近幾十年最受美國人歡迎嘅總統。咁列根選州長有咩問題？(如果劉華真係選上，如果佢有合適嘅班底，有個似樣嘅政務司司長，一樣可以管治得好。)

     

    好心啲人唔好再用劉德華做例子喇，講真，劉德華未必真係差得過梁振英架。係用都用陳山聰或者林峰做例子，大家先至信架嘛。呢一點，唐英年阿媽好多年前都講過啦，佢用個例子好好多，佢話如果Twins做特首唔掂(連結)。後來Twins因為某事件而拆夥，令佢地唔可以一齊做特首，而唐老太個仔仔都因為某事件做唔到特首，命運有時真係好諷刺。

    佢個訪問話行政長官口講愛國愛港唔夠，如果同北京溝通唔到唔會做得好。實情係咁唔代表你應整個機制出嚟，唔俾同北京溝通唔到嘅人去選，你有個普及而平等嘅機制，俾有足夠民意授權嘅人嚟選，由市民自己判斷邊個同北京溝通到、有能力管治香港，咁已經足夠。就算有提名委員會，個委員會都應該充份反映民意，最後由候選人自己sell自己，由選民決定。香港人好現實，最後好大機會會選個可以同北京溝通嘅溫和派，而唔係劉德華，個重點係個機制由提名到選舉都要公平，先至可以服眾。

     

    * 呢個人叫姚思榮，旅遊界議員，中旅社副董事長。

    片段連結：

    https://www.youtube.com/watch?feature=player_detailpage&v=f3479yUXC1A#t=917s