August 4, 2013

  • 搶槍?一場誤會?死得人架!

     

    一路以來,警察都好興屈示威者襲警,上到庭其他警察嘅供詞個官就接納,而在場其他示威者嘅供詞就唔接納,所以好易入罪。估唔到而家出到搶槍呢招(相關報導),真係估佢地唔到。

    一定有人會話,你又知佢冇搶槍?大佬呀,現場有百幾二百個警察、坐底幾千個市民,就算宇宙最強都唔會癲到搶阿Sir支炮掛?

    又一定有人會話,你唔俾佢真係癲咗架?As a matter of probability, 你傾向信個年輕人真係癲咗定係個警察屈佢?

    最後,警察一句「一場誤會」就算。喂,搶警槍係好嚴重嘅罪行,有人搶槍的話,警察係可以抆槍自衛架喇,邊有得誤會?搶槍呢啲「誤會」可以死人架大佬!愈係嚴重嘅暴力罪名,就愈要用得小心,唔可以隨便亂用。你一聲搶槍,個市民就俾四五個警察拘捕,夾咗番差館半日,然後你一聲誤會,就當冇事,咁點叫市民相信你地嘅「專業判斷」?

    警察面對非建制人士時愈來愈亂嚟,六四七一便秘式人潮控制、屈襲警、六四Tee市民響自己樓下被抬走、「黑影」事件、港大8.18事件、帶走問胡錦濤六四問題嘅記者、男警觸胸熊抱女示威者、「低調通緝」、搶槍「誤會」,說明咗咩?呢一連串事件,印證咗坊間流傳來自一啲有良知嘅警察嘅講法:

    第一,佢地俾學堂同埋上級灌輸咗太多「示威者破壞社會秩序」嘅訊息,令佢地當正反對聲音都好似黑社會咁對付,就算係唔合乎法治道德嘅手法佢地都自然覺得天經地義,而好肯定佢地係冇民主社會嗰套警察必須以保障公民權利為己任嘅思維(但諷刺嘅係青關會同愛港力就百般忍讓,甚至被打都死忍)

    第二,佢地知道同政治有關嘅場合可以點攪都得,分分鐘仲可以上位。一冇咗思想上嘅制約,掌握住絕對武力同執法權力嘅警察就好容易忍唔住手肆無忌憚,咩離譜嘢都做得出。

    第三,之前公開過嘅資料話警察有指引要確保領導人感受良好,於是一有領導人出場就出現好多公安式行徑。其實書面而且公開俾你知嘅就係咁,而唔公開嘅肯定唔只咁少嘢。收order做嘢修理你地班人,對於前線警察嚟講,都係天經地義。

    警察成日話自己「政治中立」,同陳茂波話自己「行公義,好憐憫,存謙卑的心」一樣,搵鬼信。其實林老師事件,某程度上有個作用,係連CCTVB都要報導話有市民不滿警察處理青關會手法,等社會更多人知道警察出咗問題。就呢一點嚟講,建制派批鬥林老師,係奸有奸輸。

    一個公民社會,警察唔覺得自己有責任維護公民反對政府嘅權利,已經好危險。加上而家嘅689政府,你話冇由上而下嘅指示要打壓反對聲音,就連唐英年都唔會信。再咁落去,警察濫權打壓反對聲音、侵犯公民權利、政治檢控(technically, 係警察捉然後由律政司檢控)肯定有增無減。That's why我地需要有更多好似林老師咁仗義執言嘅市民,等警察知道香港唔係無法無天、三權以外仲有公民社會監察住佢地。

     

    -------------------------------------------------

    最新消息:

    1. xanga平台前景未明,但本網誌的URL維持不變:www.kurskhk.net

    2. 最新消息,請Like本網的Facebook Page: http://www.facebook.com/kurskhk.net

    3. 新書《通識我主場》在各大書店有售。新書詳情: http://www.red-publish.com/big5/book/2038 


     

     

Comments (1)

  • It must a very confusing scene. By the way, there is a rumor that a teacher yell a lot of four letter word to the police. I do not know enough to judge. Wonder if you share the circumstances and your opinion as a teacher?

Comments are closed.

Post a Comment