分手不要在MK

你幾時有關心過我？

我幾時冇關心你？你講下道理好不好？

我唔講道理？你上次話陪我，卒之阿邊個一個電話，你就仆倒去，咩車仔咩熱刺。

我有叫你去，係你唔肯一齊去之嘛。

179號，有冇179號飛？180，有冇180號飛？

你仲講？你去埋果D地方，果D啤酒妹條裙短到上心口，而家屋企冇波你睇咩？

男人緊係成班一齊睇波啦，唔通好似D電車男咁哩響屋企上網睇呀？

186號，有冇186號飛？

喂，我地明明係183號，點解冇叫我地？

先生，唔好意思，頭先叫左兩次，不過你地冇應。

咁可唔可以補番？

唔好意思，先生，我地公司規矩，過左兩張飛就要再排過。

我地等左成個鐘，你叫我再排過？

阿生，人地都話左冇啦，唔好阻住個地球轉啦。

喂，你去邊呀？

唔走唔通仲同你響度獻世出醜呀？

喂，走咁快做咩呀？

你唔好唔講野啦。

喂，仲行去邊呀？

你唔好咁細路女啦，不如搵個坐低傾，好唔好？

兩個人，一個像滾動的毛冷球，一個像氣急敗壞的貓兒。那是每平方呎插了三個人的通菜街。

在這裡，要找個地方坐下來解決問題，能嗎？

好不容易，才找到一間上樓cafe。走上那舊樓樓梯，灰白牆身，石米梯級，長條形通風位，霓虹燈的顏色從那裡透進來。感覺像開房。

兩位呢邊吖。

你唔好粒聲唔出啦，你唔講我真係唔知你想點架。

一個蜂蜜綠茶吖。

你究竟想我點者？

嘩，哈哈，你冇講UNO，罰五隻。

Happy Birthday to you.....  Happy Birthday ....... 好野....

唔講你實唔知，原來阿Keith搭上左佢個district manager呀。

吓，果個Nancy三到抆噃。

你可唔可以講句野呀？

嘩嘩嘩....嘩.... 你整冧左，你終於輸喇，都叫你唔好抆果條啦！

埋單！呢度乜都講唔到....

不作聲的冷毛球和氣急敗壞的貓兒走了很久很久，他們走到了培正道窩打老道交界。那兒好像文明世界的盡頭，四周不是商場、不是食肆，而是華仁書院、廣華醫院、火車橋。

十字路口。

貓兒的直覺要向右走，他捉住冷毛球的手，一直走了好幾百米，看到真光書院，對面的教堂剛好有個不太當眼，離汽車路好一段距離的階梯。

終於有地方可以說話。

那一晚，整個旺角共有八十七對情侶在街頭上演過鬧劇。他們沒有那麼幸運，找得到那文明盡處的教堂。他們有些去了比街道更吵的cafe，有些去了上海街有大量道友馬伕的小公園，也有是去了麥花臣球場，但有更多的人，只是在街頭僵持數小時，被一千人次觀察過。

MK,不是一個供人講心事／分手／求婚／戀情告急的地方。

連結：8 舊街 | 7上 7下 中港 | 6 長尾理論 | 5 中環 | 4 銅鑼灣 | 3 大埔墟 | 2 MK | 1 前言 |