November 6, 2007
-
思考葛福臨佈道大會
就住最近幾個有人討論的話題，一直都有思考，以下的是未下結論前的一些思路。
第一：葛福臨佈道大會
基督新教最近的最大型活動非葛福臨佈道大會莫屬。葛福臨其實是已故著名佈道家葛培理的兒子。以前香港不時也在紅館舉行葛培理視像佈道大會，即是說單單是視像已有開Concert的聲勢。
其實葛福臨開佈道大會，不是值得「討論」的議題，今次引起討論，是因為它也是慶祝回歸十週年的活動之一。
傳福音和慶祝回歸十週年扯上關係，自然引來質疑。有論指佈道會不應成為政權粉飾太平的工具；也有論指回歸十年，問題重重，社會不公情況愈來愈嚴重，根本不值得慶祝。
也有論指不應該拿傳福音和慶祝回歸十週年扯上關係來做文章，影響慕道者的信心；也有論指佈道會跟慶祝回歸扯上關係根本沒有問題。
當我見到教會外面的巨型Banner右上角的慶祝回歸標誌的時候，心裡有一種不大好的感覺。
我認為教會領袖出席一下參與慶回歸的活動不是大問題，始終教會和政府及政治不是完全沒有關係的。
政府做東，教會做客人還可以。可是，教會攪一場大型活動，加上慶回歸的字頭，便是教會做東，攪活動慶回歸。主客關係倒轉了。
你可能會說，慶回歸有何不可？
我只能回答說，我不想慶，因為不值得慶。既然佈道會要慶回歸，新教教會做了東，我唯有不參與。最怕進了場，又聽到那些為政權塗脂抹粉的肉麻言論。
延伸閱讀
參加佈道會去慶祝回歸 1 & 2 (肥醫生@西九龍貧民區) -- 包括comment的意見
Comments (12)
政府唔夠活動，湊夠數嘛！咪拉攏下教會囉！
跟本年年都有佈道大會，理得你會唔會歸。
「已故葛培理」？他好似未死呢！http://en.wikipedia.org/wiki/Billy_Graham
oh my god... 仲以為葛培理已經回到天家... sorry....
質疑教會與慶回歸之間的關係，同時也質疑為甚麼要慶回歸。
對前部分我沒有意見，後半部，我則覺得，那不是「值得」不「值得」的問題。社會的痛苦永遠存在，即使我們有了普選，社會公平，一樣可以有人認為社會很有問題，不應慶祝云云。
我看回歸慶祝就像看結婚週年紀念，不管婚姻的內容和質素如何，那始終是個值得紀念的日子。
至於慶回歸活動那種鋪張浪費和肉麻，對比以前殖民地時那種疏淡，倒是另一個話題了。
totally agree with you
我覺得慶回歸唔係唔好
但係選擇在佈道大會的時間慶回歸...好似有點本末倒置
失去了佈道大會的意義....
不過諗返轉頭..
會唔會係主辨單位想多d人信主...
特登搞埋慶回歸...形成一片歌舞昇平的景像...
等d人覺得信左主香港更好...於是就個個信晒?!
哈哈... 不過呢d都係諗下ge姐...唔認同唔好鬧我-v-
主要回應 hystericireul的評論：
我唔覺得回歸十周年活動有甚麼「鋪張」和「浪費」。在那麼多活動中，有大量活動都是：ａ．政府部門一直做開，或即使唔係慶回歸都要搞的活動；ｂ．不是由政府組織和策劃的活動。真正純粹為慶回歸而搞的節目，其實只有幾個show、幾個大型展覽，再加兩隻熊貓而已。
在籌備回歸十周年之初，政府已經講左，任何團體都可以申請將自己的活動加入成為回歸十周年的活動，政府批准後就可以在該活動中使用十周年logo，但唔代表政府係主辦或協辦組織。所以我們才會見到一大堆九唔搭八的活動通通變成回歸十周年紀念活動。
至於「殖民地時的疏淡」，港英唔係唔想搞，而係唔搞得。記得在近幾個月某篇提及陳太的報導中，曾提過在1991年港英本來打算大搞開埠150周年活動，後來因擔心中方強烈反對而在高層公務員系統內被壓下來。這事也的確「前車可鑑」，澳門曾打算搞葡人統治澳門4X0周年的活動，因中方嚴重不滿而被迫全部臨時取消。畢竟對中國來說，葡英皆屬侵略佔領。
另外，如果回想起1986年英女皇訪港（試與今日中國國家主席訪港比較），或者從紀錄片看一下1950年代伊利沙伯二世登基時的粉飾太平，那種鋪張，也是夠厲害的。
謝謝Chungpui老師！
所以我覺得，其實不存在甚麼「唔值得慶祝」的問題，就跟生日一樣，每個人的生日其實是母難日，那難道慶生又是一件不能接受的壞事了？
唔講教會
講下商業社會
慶回歸跟本係商機
無得慶,業內從事productions嘅人仕都無飯開
慶回歸唔係做比你睇
正如無線師拉劇一樣,你唔睇有好多人睇
你唔睇不代表他們對社會毫無貢獻
如果講教會,我係教友,還有一點義務。
如果講商業社會,我係消費者。我沒有義務幫業內從事production的人開飯,他們有沒有飯開視乎production水準。我幾時講過或者暗示過佢地對社會「毫無貢獻」,點解你咁鍾意想當然地對號入座?
我作為一個獨立個體,我鍾意慶就慶,唔鍾意慶就唔慶,我話知佢係葛培理定葛文輝。
我亦無話你係話緊佢地無貢獻
只係話緊比你知佢地對我地呢個社會都有好大既貢獻
你可能對我既說話好反感,但係我真係無話你話佢地無貢獻
做人唔好咩都用政治角度去睇
Kursk 兄不用那麼激動。據小弟所知，真正政府有份出錢籌劃的十周年活動，可在以下的網頁check 到: http://www.gov.hk/tc/theme/10/events/index.htm
而這個佈道會似乎不在名單上 (祭孔的活動則在其中)
如chungpui 所說,今次應該係教會自己向政府申請將自己的活動加入成為回歸十周年的活動及用上十周年logo。
那個甚麼十周年辦公室的主任已經去了跟林鄭做常秘，十周年活動已經在政府內無疾而終了(因為要全力"攪"好出年既馬術)
今年叱吒都有乎應"回歸"
攪了一個"又一個叱吒十年回歸音樂會"
回歸十年,是一個紀念
紀念大時代變大變遷
回歸值唔值得紀念,視乎你用咩心情去紀念
叱吒絕對係一個商業活動
絕對唔係一個由政府陰某促成的回歸show
無啦啦音樂會同回歸又有咩關係呢?
都係一個紀念姐
無線大大少少既回歸show同節目做到你驚
連最緊要進步都被視為慶回歸節目真係O嘴
今年所有野都同回歸有關好正常
再講
文化界又何嘗唔係借回歸搵翻壹大筆
講咁多,只係想話你知,"回歸"係政府眼中係慶典
係商界眼中係商機(文化界班出書佬都算係商界)
Comments are closed.