仲記得細細個果陣，有ｄ老師係台灣畢業返黎既，會講五四，魯迅既文學大中小學時候都有睇，五四既背景、人物、經過、影響，都幾清楚（話晒都讀足七年中史），記得不論係官方、親台親共泛民乜乜物物，都對五四精神稱頌有加。

細細個既時候，已經覺得五四既前人既敢於批判同反抗既精神好得，後來發生左六四屠殺，更加覺得中國其實唔係冇將來，至少我地仲有好多青年敢犧牲好多野，包括條命去為國家出聲。

今日係五四九十週年，而六四都就黎二十年，今日睇番教育局資助國民教育服務中心同文匯報出既《五四運動90週年》同《開放改革30週年》教師專刊，真係笑左。

先講《五四運動90週年》，講到D青年有幾愛國有幾英勇，逐頁揭黎睇，由背景到經過，只要將D年份、人名同相片換左做89年學運既野，其實都幾似，甚至89年既學運，比起1919年既五四，溫和不知幾多倍，不過，結果就....

再睇《開放改革30週年》，中間有一頁係「人權和民主建設」，頭兩句「改革開放30年，中國人民的公民權利和政治權利得到進一步保障。」對唔住，我睇果真係覺得好攪笑，陣心裡面真係出左個粗口字做助語詞。我相信中國公民應該唔包括好多人，例如六四死左既人、胡佳同佢太太同個女、好多維權律師、簽左《08憲章》既人，仲有好多上訪時俾人捉左去精神病院既人。

中共既人民英雄紀念碑上面，有一part係五四青年既英姿，而中共歌頌既五四精神，到左六四既時候真係有大學生照辦煮豌，要求有賽先生(science)，又有德先生(democracy)，就俾你中共殺Q晒（陳一諤應該會反對，因為冇響天安門殺，而且都唔係殺晒，而殺左既又唔知係軍人定係平民，就算係平民佢地自己都有責任。其實陳會長肯落台未？）。

如果真係要同莘莘學子講五四精神既話，我相信仲要加一part叫「六四英魂－五四精神的傳承」，咁先至真真正正係面對歷史，面對國家民族既表現。不如，你個咁既所謂國民教育咩中心，有咁既guts咩？

中共要歌頌五四精神，好正常，因為共產黨都係五四時起家，但係佢對六四既歷史同有份犧牲既人既態度，就好似一個牧師星期日朝早講道，夜晚就去左深圳幫襯夜場一樣攪笑。（對唔住，我心裡面又出現左個助語詞）

唔好意思，今日冇心情寫語體文。