根據本blog周末只寫流水帳既慣例，呢篇只係一篇時事流水帳。
香港再出發？
《香港再出發宣言》，好多人鬧，又話會曲線鼓勵七．一遊行。其實我覺得講多都廢事，只係一班親北京既戰後嬰兒自慰既宣言。不過，梁振英又聯署左，佢真係可憐，唔簽又唔係，簽又唔係。唔簽又好似唔支持，簽左就令佢同香港人果幾光年既距離又多左幾萬公里。想做特首呀？都係要等外星人黎地球捉晒佢班對手走先有可能。
警察遊行
警察遊行反對政府，係1977年來既第一次。上次就話生死尤關，所以要去同ICAC死過。事隔三十二年，今次呢，係為左薪級表問題，仲要係經濟衰退既時候，真係名不正言不順。對於阿爺黎講，咩人遊行都得，但suppose最忠誠既警隊走出黎遊行就好敏感。陰謀論D咁講，會唔會係有人做野，煽動D阿Sir去攪阿曾特首呢？
正生事件
正生事件，都係果句，鄉下人公關能力真係好低。見到正生果班年輕人，記得以前睇過唔少正生書院既報導，呢D浪子回頭既故事從來都係金不換，尤其是自己做教師，接觸過有唔同問題既學生，更加相信年輕人犯錯，需要成年人接納同關愛，先有可能改過。正生攪得好有heart，不過我地香港既青少年戒毒院舍嚴重不足，而正生更加係私校，即係話要靠捐獻黎維持，唔可以話唔可悲。
索K問題
最近青少年索K問題愈來愈嚴重，根據禁毒處既數據，吸毒既年輕人，尤其係在學果D既人數升得幾明顯。至於點解，有調查指朋輩影響比個小朋友本身開唔開心更重要。呢個問題之所以係問題，唔係D小朋友唔知吸毒有害，等於食煙有害係人都知都係照食一樣。問題係成套價值觀既系統，同埋家庭學校既支援系統出左問題，而D K仔就愈來愈平，愈來愈就手。可以點做？我都想知。
不過，我有個唔太科學既推測，Band 3學校一直咁殺，於是Band 3學校有心有力有經驗既老師就被迫走人，而社工因為一筆過撥款就人工有減冇加，甚至工作不保。數字管理既公共行政思維之下，錢就慳左，不過幫到有偏差既小朋友既人就少左，兩者有冇統計學上既關聯性我唔敢妄下判斷。
鵝頸選區補選
最後，鵝頸選區今日補選。社民連既季詩傑對民建聯既鍾嘉敏。住左廿年灣仔，不過我冇份投票，又唔識人住果邊。對於呢次選舉，我只有一個意見，就係果區2003年民建聯個大佬孫啟昌選輸左，跟住2007年唔敢出黎選，派鍾嘉敏出黎選，又輸。我以為孫啟昌唔選係知道自己響果區得罪人多(根據圈內人的小道消息話佢得罪唔少人)，知道自己應該收工，俾d後生既上。點知，原來條友一個屈尾十就俾政府委任做番區議員，仲做埋主席。哈哈，原來敗軍之將，連選都唔駛選，又有得做番，都話入民建聯有前途啦。所以，一句講晒，如果有讀者係鵝頸區選民，唔該唔好再選多個民建聯入去喇。
石首民變
(武警被擊退的youtube短片 | 連內地的新浪視頻也看得到，真的作反了)
這樣的情況，在內地不時發生。辜勿論事件誰是誰非，至少有兩件事是值得我們關注的：
- 為什麼在級數低一點的縣市，不時會發生這樣的事件？
- 為什麼在近乎警察國家的我國，民眾那麼容易被號召／煽動，冒著被拘捕甚至殺害的風險去衝擊公安武警和政府機關？
上述兩條問題的答案投了稿，如果投籃便post出來。
Recent Comments