June 30, 2009

  • 香港點出發 (寫在7.1前)

    寫口語既時候，寫既又開心，睇既又開心。寫政治野，間中寫下口語，冇咁死板。

    我愈來愈相信《信報》練乙錚同劉迺強係夾埋既，用劉迺強既講法係「配合得太明顯了」。劉迺強隔日出一篇三分一版咁大篇既曲線救國文章，然後練乙錚就反駁佢，順便指出中共專政既問題所在。

    劉迺強今日篇文《請退回到黃線之後！》，就好似D教師放份marking scheme響枱面，離開班房之後，叫個同全班好friend既班長幫佢攞番，千叮萬囑個班長「唔好攞份marking影俾全班同學」一樣。阿劉生其實係想提醒全香港「聽日係七．一，唔好上街遊行呀」，佢驚大家唔睇佢篇文，仲要提大家六四既時候「一個人擋在一隊坦克面前，畫面的確震撼。反對派聲稱這是「屠城」的實證，但是為什麼當時開的攝錄機卻沒有拍到他被輾過呢？」正呀喂，馬力上身呀大佬。

    其實七．一上唔上街，係好個人既事。你未必需要同意晒遊行既所有議題，你自己有自己既議題就得。譬如好似有個大學生朋友，佢上年約女仔七．一上街，兩小無猜一齊表達對特區政府既不滿，之後個女仔就變左佢女朋友。七．一爭取既野多數都爭取唔到，呢D成功爭取既議題，真係難能可貴。

    我七．一上街既話，我會諗起以下既議題。

    普選－曾特首話因為金融海嘯，所以本來應承左上半年做既政改咨詢，要推到年尾先做。03年七．一上街既三大素求「反對廿三、董建華下台、還政於民」，頭兩樣成功爭取到，而第三樣，過左六年，仍未成功，大家仍需努力，上街表達爭取普選既訴求。

    地產商治港－縮水樓、發水樓、把地契規定的公共空間私有化、霸道的市區重建、屏風樓、殺樹等，都係官商合作之下既產物。舉兩個例子：

    1. 大角咀市區重建項目海桃灣，把一幢單幢樓三面封殺。[閉翳大廈「海明閣」的故事]
    2. 前水警總部的發展項目，192棵樹，殺剩廿幾棵。[前水警總部移山拔樹 專家批失真]

    劉曉波－大陸無理控告《零八憲章》既發起人劉曉波煽動顛覆國家政權罪，連埋之前既胡佳。地方既維權人士被地方政府拘禁，大家都可以賴地方政府。但劉曉波同胡佳呢D國家級既反對派，中央政府都係話拉就拉，呢個中央政府既本質就係極權。Facebook add過做溫家寶fans既朋友，唔該諗下應唔應該remove番啦。

    全國網民同氣連枝－內地既事唔關七．一事？內地網民發起七．一罷網喇。學劉迺強話齋，香港同中國分唔開，我地唔可以咁自私只係愛香港，唔愛中國(既網民同人民)。

    仲有另一個鏗鏘有聲，廣傳中既宣言：2009匿名网民宣言

    大家聽日遊行見啦。

Comments (19)

Comments are closed.

Post a Comment