November 23, 2012
-
梁振英你仲有咩誠信可言?
唔好意思，火滾就會用口語寫文。請見諒。
梁振英終於肯交代僭建同誠信問題，不過係同中學生用whatsapp講分手一樣，書面講就算，唔夠膽面對傳媒同公眾。
睇完呢份聲明，不難發現問題根本冇解決到。
成交前三日，對方先至改terms，表明唔擔保冇僭建，梁振英都照成交。好，我當你梁振英真係咁鍾意間屋，鍾意到明知個單位唔保證冇僭建、就算個Title可能因為僭建物而有問題都照買*，咁之後呢？
「朋友」建築測量師？
第1頁第5點提到「一位建築測量師朋友查過。我是根據當時的認知如實告知，沒有任何壓力、也沒有任何需要揑造。我想重申，買入物業的是我本人，我不想牽連任何其他人，包括有關的專業人士，這件事的責任由我本人一人承擔。」
你個「建築測量師朋友」唔係你梁振英話唔開名就得。你唔開名即係死無對證，甚至有冇呢個建築測量師都冇得查證。你話你個朋友義務幫你睇，睇完你就信到十足，你同佢之間冇contractual relationship，你憑咩會信佢會好似幫客人睇則睇得咁仔細？
另外，你個「建築測量師朋友」而家係專業疏忽，你唔追究佢，唔開佢名，「害」到你俾人質疑誠信有問題，呢個就唔係你一個人話承擔就得，因為呢個係涉及特首選舉嘅誠信問題，係一個公眾利益嘅問題。至少你個唔知存唔存在嘅建築測量師朋友必須出嚟面對公眾。如果唔係就應該用立法會特權法傳召佢。
你唔開名，市民就有合理理由懷疑你係講大話，用個唔知存唔存在嘅人做擋箭牌。
自爆密室大話
2012年3月，選舉辯論嘅時候，梁振英咁樣攻擊唐英年：
「你僭建唔係單純僭建問題，你係公開向市民講大話、隱瞞！」
到2012年6月，佢自己俾人踢爆有僭建，佢就話係「無心之失」？
究竟梁振英選特首嘅時候有冇講大話，佢呢份聲明已經說明一切：
根據13頁第45至46點，梁振英聲稱佢一路都唔知地牢多咗個淋浴室同桑拿房，直至佢響2011年11月「發現」發現洗衣房、部份儲物室和工人房係非法擴建，於是就搵磚封咗佢就算，冇打算復原或者向屋宇署申報，因為「當時並無任何人查詢我家中僭建問題，我當時並不知道有其他問題」。
當2011年5月，政府高官連橫被揭發有僭建嘅時候，記者問佢有冇僭建，佢口口聲聲話專業人士睇過話冇#。跟住到佢要選特首，佢肯定知道唐英年其中一隻痛腳就係地牢僭建，於是2011年11月嘅時候就拆咗同封住地牢有問題嘅部份，好似無線劇集藏屍咁。唔出聲，又唔申報，搏你地睇唔到。
響2012年2月，唐宮事件發生之後，記者問佢有冇僭建，就話有律師同建築師睇過冇僭建。咁2011年11月發現嘅唔係僭建係咩？好明顯呢個係梁振英嘅「語言偽術」－－封咗嘅就唔係僭建？？
呢個時候一定有人出嚟話呢啲屋僭建好常見、有時就算專業人士都會睇漏。不過，不論係梁振英個「朋友建築測量師」，定係之後個建築師，同你梁振英睇則嘅時候都見唔到個地牢非法改裝同擴建？唔係掛？
成件事更合理嘅解釋係，好多呢啲屋內攏都係僭建到七彩，因為屋宇署嘅飛機相影唔到，所以所有人都大安旨意唔理。梁振英有所謂專業人士同佢睇，點會睇唔到，不過明知有僭建都唔理，因為冇人會睇到。向屋宇署申請都淨係申請戶外嘅改建，因為戶外容易睇得到。
因為地底嘅僭建睇唔到，所以佢響2011年5月同記者話冇僭建。就算佢2011年11月「發現」有僭建之後，到2012年2月都唔單止對記者講大話，仲厚顏到響電視上面指責唐英年「僭建唔係單純僭建問題」、「公開向市民講大話、隱瞞」。
淨係從佢呢份聲明，已經肯定佢選舉嘅時候一路大話連篇，厚顏無恥至極。試問咁嘅人有咩資格做特首？
聲明全文: http://www.ceo.gov.hk/pdf/CE_Statement.pdf
* 有關個物業冇Good title嘅問題，可參閱林忌嘅專業解說。
Recent Comments