Day: June 21, 2013

  • World War Z短評, inevitable

    睇咗World War Z。簡簡單單講幾句先:

    [Lv.1 - 沒有劇透]

    1. 如果你係好像我咁嘅喪屍片迷,應該睇。

    2. 如果你係想睇A級製作嘅驚嚇片,都值得睇。

    3. 如果你好鍾意Brad Pitt,咁入場當然係inevitable。(我見戲院裡面有單丁一個女仔睇架)

    4. 呢套野好多場面都算係好過癮,至少係響喪屍片裡面第一次見。

    5. 喪屍fans裡面有一批原教旨主義者認為喪屍一定要行得好慢,如果你係呢批原教旨主義者,咁你唔好睇了。

    [Lv.2 - 輕微劇透]

    1. WWZ係喪屍片歷史上最大卡士同最高規格的製作,單係睇場片同特效算係值回票價。

    2. 大致上成套戲都算好緊湊,冇乜冷場或者白痴位,係一套計算頗為精準嘅A級片。

    3. 但係,佢地將成套戲最勁嘅場面都剪晒落trailer度...

    4. 喪屍片由頂級明星做主角,今次係第一次。睇Brad Pitt係就係好睇,但係佢破壞咗喪屍片一個好重要嘅傳統。

    5. 喪屍片一個好重要嘅傳統係你永遠唔知主角同埋主要配角會唔會死/幾時死--以前啲主角同主要配角都唔係大卡士,所以可以隨時死。但請Brad Pitt嚟做男主角,你就會一開始就100%肯定佢點都唔會死,咁樣個緊張程度點都會有影響。

    6. WWZ竟然有進擊的巨人feel。

     

    [下有高度劇透]

    .

    .

    .

    [Lv.3 - 高度劇透]

    1. 故事去到尾段,可能係因為budget用晒,所以佈局、場面、情節都downgrade咗一級。去到最後嘅Lab嗰度,感覺好似睇緊生化危機咁hea,完全冇晒張力。

    2. 我冇睇原著小說,唔知原著係咪一樣。不過我想問,Brad Pitt大晒呀而家?佢嘅好彩程度,相信就算全人類死晒,佢都會冇事。連撞機全機人死晒,佢都可以冇事。似乎真係太過夾硬嚟。佢去危險病毒樣本倉度求其搵未支針拮自己,萬一冇對應嘅藥物治療,又或者啲喪屍都係咬佢咁點算?不過因為佢係行運超人,所以冇法子。

    3. 就算美國總統同埋高級將領都死晒,其實佢地都仲係指揮緊聯合國部隊(艦隊同空軍其實都係美軍)。個導演都係話俾大家知,冇美國,聯合國拯救唔到人類。

    4. 個人認為,如果套戲可以多啲深入描寫世界政治矛盾、人性醜惡更好。

    5. 原著話個喪屍源頭係強國(可能又係因為食野味?),而家就話係來自台灣。真係避諱到爆--台灣係中國自古以來神聖一部份嘛,我知。

    6. 話就話阿Brad Pitt去調查,但係自從阿邊個無厘頭死咗之後,Brad Pitt其實都唔知自己查緊咩。去南韓、以色列都唔知為乜,明明新聞話台灣可能係源頭,但係佢又唔去查。

    7. 喪屍片仲有一個傳統,就係通常會有一個強悍嘅女角,同埋至少一個累人累物嘅女角。WWZ好尊重呢個傳統,強悍女角就係嗰個女兵,而累人累物既就係Brad Pitt老婆,好心佢呀,個老公做緊野就唔好打去騷擾佢啦。

    8. 原著本來係講因為喪屍危機,以巴終於和解。電影版都係咁,不過就加入咗中東伊斯蘭教班人唔覺意害死以巴兩族人嘅情節。加埋故事裡頭講到以色列因為果斷先至可以自保咁,其實係美化緊以色列既強硬路線,尤其是佢既種族隔離圍牆政策。

    9. 以下呢張圖或者解釋到點解個原著會寫強國係源頭,可能個作者去強國旅行時見識到呢啲場面(圖為上海人為咗見碧咸人踩人事件嘅相關新聞圖片),所以用咗嚟做情節,就好似阿邊個去完張家界之後,就有靈感設計阿凡達啲仙境一樣。