December 26, 2012

  • [平安夜]和民食出法國餐感覺

     

    話說我去咗始創間和民，我地六點鐘點菜，佢地規定今晚只能叫聖誕餐，咁都好正常。點知頭兩三道菜都正常，跟住到個火鍋，我地等咗成半個鐘，於是摧吓又等吓，摧吓又等吓，如是者摧咗成個鐘。

    同場其他枱都係同樣情況，於是每一枱不斷輪流摧，好多枱摧到發脾氣，事關我周圍每枱都係咁。呢個時候睇附近嘅男人安撫女伴，可以話係患難見真情。

    八點，個鍋終於出現，我見隔離枱等雪糕都等到個男嘅要攬住個女嘅氹番，所以早啲叫埋雪糕。

    點知個侍應話.....「唔好意思，可能要等半個鐘。」
    我話「吓？半個鐘，你地啲雪糕未整好？」
    佢話「因為廚房好多單未做....」

    結果，個雪糕早咗，廿分鐘就到。我地為咗記念呢一刻，所以影低張單做留念。呢餐飯食咗兩個半鐘，當中有兩個鐘用咗嚟等。

    其實諗番成個過程，真係幾抵，一來我地坐響度嘅時間，已經等於正常三round嘅生意，而個餐三百有找，除開時間真係平過茶餐廳; 二來同附近啲火滾食客相視而笑，大家都享受咗一個好難忘嘅晚上; 三來，我同太太可以用和民價錢，回味番渡蜜月時響法國食晚飯食足成晚嘅感覺，真係好溫馨。

    By the way，成個過程，我見啲侍應不斷俾人摧同發脾氣，已經疲於奔命，所以都冇難為佢地，問題似係響管理度。不過咁嘅logistics安排，真係要提醒各位提防，唔好中伏。而個故仔咁難忘，似乎應該同Openrice網民同埋和民嘅管理層分享一下。

     

    ［Tag: 生活推介系列］