January 6, 2013

  • 舉港英旗又如何？

    本來文匯大公嘅嘢都係當奇文共賞，好似睇動物園馬騮咁睇，例如呢篇《舉港英旗 叫囂「港獨」 自絕於民 - 香港文匯報》。不過關於呢樣嘢，不吐不快係因為唔只土共同文匯報係咁講，一啲50後、60後老鬼都講緊類似嘅嘢。

    1. 「自由並非他們敬仰的英國人賜予，而是中央政府通過《基本法》賦予港人的」－－錯。《基本法》係根據《中英聯合聲明》寫成，如果真係有「賜予」，都係中英兩國賜予，更何況《基本法》條文細節嚴重剝奪香港人選舉權。

    2. 「港英治港時期黑暗的歷史」、「對愛國愛港群眾歧視打壓的歷史」－－60-80年代初嘅港英的確係好高壓，但係點解香港人仲咁貼貼服服？都係多得放炸彈同掟燃燒彈殺人嘅左仔。如果要數歷史，英國人過去兩百年對中國人做嘅惡行，連中共過去六十年做嘅零頭都不如。「今日高舉中共國旗的人又知道多少呢？」

    3. 「貪污橫行的歷史」－－Come on James... 貪污橫行？自從ICAC成立而嚟，呢三十幾年香港係全亞洲最廉潔地區之一。咩嘩？你講三十幾年前四大探長嗰陣？ 

    4. 「將香港視作英資企業金庫的歷史」－－係啊，嗰個年代，香港人爭住入大洋行打工、聖誕鐘買匯豐(股票)，點解嘅呢？

    5. 對唔住，我生於70年代，我出世嘅時候，香港已經有ICAC、十年建屋計劃、公民教育，後來開始有區議會同市政局選舉，到90年代嘅時候，立法局比而家仲民主，又冇分組投票。至於我嘅所謂「祖國」，我出世嘅時候文革雖然完咗，但好多人仲未放監，到咗80年代，「祖國」政府屠殺平民，到咗近呢十年，維權人士死嘅死、收監嘅收監、軟禁嘅軟禁，個國家墮落到不堪入目。

    6. 如果真係要數國仇家恨，我恨殘害百姓嘅暴政比港英更甚百倍。

    7. 如果老鬼覺得民族主義自high，high到被中共利用先至係正途的話，那麼繼續自high吧。

    8. 同埋，唔好意思，我係文化上嘅中國人，我認同嘅係真正能夠讓國民免於恐懼嘅民主中國。可惜我申請唔到中華民國護照，如果唔係我一定會去申請。

    9. 舉港英旗有咩問題？問題係落咗共產黨面，香港係言論自由嘅地方，香港人舉一支已經唔存在嘅行政區域嘅旗，就係為咗表達對現狀嘅不滿。

    10. 當然啦，有啲人靠維穩開飯，愈撩起香港人把火，就愈有米路。

     


    (圖片：washingtonpost.com)