November 23, 2010

  • 第二次韓戰？

    今日既新聞，令我諗番起呢本好多年前睇過既漫畫《第2次朝鮮戰爭》。

    作者係日本軍事漫畫大師小林源文（其實佢既作品內容都幾右翼）。呢本《第2次朝鮮戰爭》講金正日因為糧佞危機，無端端打南韓，最後戰無不勝既主體思想政權俾美日聯軍登陸攪掂咁。其實北韓邊有可能冇飯開到要打南韓？我睇咗戰爭史既書咁多年年，真係想像唔到一個成日飢荒同埋冇得上網既國家可以打贏一個有美國駐軍既國家，呢個國家仲要係出Samsung既國家。以北韓咁既科技同資源，就算俾你人海戰術打到晒成個南韓，聯合國反攻你都冇可能守得住。冇飯開唔駛打仗既，扮想打仗就得喇，萬大事有天朝照住，最唔想北韓死既就係大陸（其次可能係日本政客）。

    響南韓服兵役真係唔係人咁品，分分鐘冇命。n年前響交流營識得一班南韓既大學生，個個都係硬漢，佢地服兵役真係唔係講玩。

    北韓呢ｄ真係邪惡政權，對內對外都係害人害己，早完早著，不過佢有個獨裁老大哥睇住，大家一齊做大小不良。

     

    講開南北韓打仗，我諗起《聯合安全全地帶》"JSA (Joint Security Area)"，呢套戲我好鍾意，佢某程度上係講緊南韓人對北韓果種兄弟相殘既無奈，個故事既鋪排做得好好。

     

    另外有一套《太極旗飄揚》，呢套既開場既情節，連我地既TVB既義海豪情都要向佢致敬。講既都係兄弟相殘既無奈，我估呢個係南韓人既心結吧。（而南韓間諜片就興男女間諜為咗愛情背叛北韓政權）

     

    唔係想抽南北韓衝突既水，而係真係有感而發。寫blog就係咁，有感而發咪寫囉，唔駛一定要考慮咁多既。

     

Comments (9)

Comments are closed.

Post a Comment