其實至少七八成香港人一聽到「菲傭」兩個字就已經上晒頭，咩法律​、公義都唔會理，甚至連入境處申請做永久居民有好多限制都唔會理​。總之就係一聽到係菲傭就上頭。

而家人地係根據《基本法》24條打官司，官司贏輸唔係申請司法覆核既人既錯，走去怪責冇得唔接官司既大律師李志喜更加係無稽兼無賴。咩叫法律面前，人人平等？打官司贏輸係睇法律理據，唔係睇香港人歡迎咩人贏。菲律賓人係咪人？如果係既話，就有權爭取法律面前人人平等既保障。

如果大家覺得唔應該係咁寫，係應該打完官司不論贏輸都開始著手修法，既然咁有民意基礎，應該修改《基本法》24條吧？有民意基礎之下修憲係一件正大光明既事，有乜問題？相反，人大釋法唔同修改《基本法》，釋法係佢本來字面唔係咁既意思，你而家用人大既權力夾硬加個解釋上去，咁樣等於繞過要香港立法會，直接由橡皮圖章人大去更改基本法既內容，呢個絕對唔應該郁Ｄ就做既手段。

我記得十幾廿年前香港傳媒真係將中環既菲律賓人聚集當負面新聞大​做特做,港英政府亦有「鼓勵」佢地去特定既學校or社區中心玩,​ 唔想佢地去攪到「高貴」既中環唔高貴。當時香港社會對外傭既態度近乎係法西斯，而家大家接受人人都有權去中環行人專用區坐，已經好大步，不過仲有好大進步空間，但係果d帶頭製造歧視同仇恨既政黨，完全不可原諒。

新民黨、民建聯、自由黨大鑼大鼓，又登大版廣告、又周街派單張，煽動香港人對外傭既恐懼同仇恨，好多人要搵食冇時間深究，又或者一聽到外傭就上頭，可能真係會俾呢Ｄ咁既所謂政黨煽動。之前家暴條例、淫審條例、最低工資，都冇恐懼外傭既效果咁強。或​者可以咁講，香港終於有一個真正挑動選民不分貧富自動向左走向右​走既議題。呢個係建制派千載難逢既機會製造恐慌仇恨，拉攏中間偏​泛民支持者歸邊，兼且抹黑司法制度既權威。

過去咩人最鍾意抹黑司法獨立同埋法律界？正正就係文匯報同大公報，對於土共黎講，法律根本只係管治既手段，法治精神如果令行政唔方便，就抹黑法庭同律師係港英餘孽同狀棍。對於佢地黎講，最理想既司法制度就係聽話既司法制度。

睇得到呢篇既朋友應該都係有知識既一群，希望大家真係認真去諗一諗成件事。如果你覺得件事好複雜，唔明或者唔想理既話，冇理由既，至少你都睇到第七段喇。

如果外傭贏左官司有權申請入藉，咁佢地都係響同其他外藉人士同一條隊申請，咁問題就係根據咩人口政策去批，而唔係佢地係咪菲傭印傭。如果我地仲希望個社會係有法治精神既保障既話，就請尊重呢一場官司。如果《基本法》真係有修改既需要，咁就應該政府同民間一齊推動修改，唔好下下就叫人大釋法。同時，唔該大家真係冷靜諗一諗果幾個政黨既宣傳究竟係講緊事實，定係製造仇恨？

堂堂一個自由黨，以對手黨員打官司既專業操守抹黑該政黨，根本冇專重大律師既專業，枉稱係代表所謂既工商專業階層；堂堂民建聯同新民黨，煽動歧視同仇恨，前者欺騙基層市民，後者煽動中產保守情結，跟西方那些惡名昭彰的右翼政黨有什麼分別？

各位朋友們，向左走定向右走，大家自行定奪，我只係想提醒大家，唔好被排外情緒或者對外傭既主觀印象影響自己對問題既判斷。

(自由黨廣告)

(民建聯宣傳單張)　圖片來源：網上搜尋

延伸閱讀：

梁啟智﹕從居港權看民主價值

唔好意思，呢兩日工作勞累，用咗口語寫字。請大家見諒。