July 25, 2009

  • 生活軼事(7月下旬之1)

    因為近排寫長文太多，今日乾塘，連星期六都出生活軼事。

    政治

    澳門選特首，娛樂性高過o靚模肉搏--睇住個肥哥哥響度做國王的新衣，明明冇著衫，又要扮有著，身邊D人仲要讚佢著得好睇。果個提名機制，變相係記名選舉。

    呢D叫做選舉咩？就好似個個o靚模都話自己係健康性感一樣，唔好玩啦。

    政治部份完。


    書展對生活的影響

    因為書展開正喺小弟生活圈裡面，尋日唔小心進入咗好多人既駱克道一帶搵飯食，多人到呢....　去警察總部對出，樓下係夜總會，一間睇個樣都唔似好生意既火鍋酒家，竟然出現以下情節：

    「兩位」

    「我地冇位噃」

    「....」

    連等位都唔俾既酒家，真係第一次見。唔怪得果度冇人排隊。

    今日同兩老由灣仔搭船去尖沙咀。個碼頭多人到好似拍戰爭片一樣。我地等咗兩班船先上到。最離奇既唔係呢樣，而係...

    船去到海中間，個廣播話對面碼頭架船開唔切，叫大家等一等。於是我地免費享受到觀光船既待遇，享受咗好耐。由等船到落船，用咗40分鐘。


    食飯

    同長輩們去北京道一號間某米芝蓮飯店食飯，嘢食都OK，個景更OK，食食吓熄燈俾大家食住睇幻彩詠香江。長輩們食得高興，此刻無價。

    殺退巴士播歌男

    同一位兄弟搭巴士，巴士上層冇乜人，後幾排有個人用手機播歌，成層都迫住同佢分享音樂，但係佢播既係好多年前既王傑既「不浪漫罪名」。

    為咗響應佢，我地嘗試跟住唱，一路唱一路忍唔住笑。不過唔係好跟到，淨係一路笑。

    之後果首，竟然係王傑既皇牌K歌「心癮」，於是我地繼續一路笑一路跟住唱。可能後面個播歌男覺得我地影衰佢偶像，於是走番落下層。

    敗犬女王與禁書

    仲睇緊。以我對三高女士的認識，應該可以寫多幾篇相關題目。遲D寫吧。

    上個月睇過Leona寫的《讀懂男人心，港女好出嫁》，一時好奇，真係買咗裡面介紹果本"Act Like a Woman, Think Like a Man"黎睇。本來唔敢寫呢D禁書，不過見方大也寫了，我也加入。

    文章裡面既重點提到男人要有既"Profess, Provide, Protect (3P)"素質。不過，其實果本書真正既重點係女性點樣先有可能找得到終身伴侶，呢個聽日寫吧。

    生活軼事系列，逢星期日出街（本周提早）


Comments (16)

Comments are closed.

Post a Comment