又到星期日既生活軼事時間。今日個xanga唔知點解load得好慢...

酒井法子...

對於我呢個年紀既人嚟講，今個星期最大件事好可能係酒井法子出事。見佢咁樣，不其然諗起《門徒》裡面張靜初果個角色。唉，雖然鍾愛酒井法子既一代人已經有番咁上下年紀，都知道世途險惡，都知道社會複雜。不過，人始終想有美麗既回憶，呢鑊嘢對我地呢一代剛脫離草莓期既男性真係好大打擊。

藏毒舊橋

即時新聞話「一名從南非洲返港的香港青年，涉嫌以可卡因滲透入衣物纖維的運毒方式運毒被捕。」睇有線新聞既時候，海關發言人話係第一次發現咁樣運毒。不過，據我記得，90年萬梓良做既港產片《豬標一族》裡面，就係講有人用呢個方法運毒，完全一樣。（原來唔覺唔覺，由細到大都睇咗唔少港產騎呢片）

校園驗毒

個計劃有咩問題？信報幾位權威已經討論過，包括：

• 主筆練乙錚講政府個報告響科學論證上未有證據證明校園驗毒計劃真係可以減少青少年濫藥；
• 法律系教授戴耀廷指計劃可能違反國際人權公約（後來政府話學生可以拒絕）；
• 社工系周永生教授直指出此計劃的漏洞，「政府只曉得推銷驗毒計劃，但善後工作到現在付諸闕如」。

作為教師，我絕對同意毒品的禍害極深，絕對同意要對抗毒品，但這不代表倉促上馬，未進行充分政策論證之前急於實行這個極具爭議性既措施。況且，自願驗毒的背後邏輯大有問題，呢個遲下有機會再談。

如果我係家長，我一定唔會簽同意書。那是受法例規管既「收取身體樣本」行為，在香港法例中是用在懷疑刑事罪犯身上的。有冇吸毒，係我同仔女之間的事，我決不會俾佢地受刑事罪疑犯的對待。如果我簽咗個同意書，我以後怎樣點同我既兒女相處？呢單嘢好似大逃殺和死亡預告的香港版...

寫寫下又變咗議論文...

笑話一則

響twitter上見到既：

剛獲釋的兩位美國女性公民淩志美和李麗娜向媒體表示說：當我們打開門，看到克林頓總統站在那裏，我們驚呆了；我們也立刻醒悟到：美國完了，連克林頓都被抓了。

義勇群英 G.I.Joe (內有劇透)

我去睇純粹係因為我細個果陣好迷G.I.Joe。估唔到....

• 男爵夫人原來係敗犬女王.....
• D人加入G.I.Joe會媾女....
• 要拯救世界，都係要用兒女私情先拯救到...

又估唔到，原來又係「一個饅頭引發的命案」

不過，最估唔到既都係...

原來係地球停轉日續集，D納米虫一模一樣.... 俾D新意嚟睇下好唔好？

敗犬女王

個個禮拜都講敗犬女王，大家應該好悶。所以唔講喇。繼續睇。

Spacelocker

最近有個叫Spacelocker.com既網站，大家千祈唔好登記，呢個網站既手法唔老實，而且登記咗係冇delete account既選項，要直接聯絡webmaster先可以取消。

你媽媽喊你回家吃飯

本來呢句係內地網上既玩嘢潮語。而家變咗做聲援被捕維權人士、網民、良心犯既口號。最近媽媽喊回家吃飯既人士包括：

• 調查豆腐渣工程的維權人士黃琦
• 要求公佈四川地震死難名單的譚作人
• 維權組織「公盟」負責人許志永和財務人員莊璐7月被公安拘捕，而家都未可以見律師

一D都唔好笑，只不過喊回家吃飯冇咁易俾公安拉。呢個所謂既強國真係好可悲。