（內有劇透）
我認我睇咗《義勇群英之毒蛇風暴(G.I.Joe: The Rise of Cobra)》。
義勇群英對童年既我嚟講，等於酒井法子對我果個年代既年輕男仔一樣，屬於美好回憶。
如果你話俾我知卡通裡面既頭號女奸角男爵夫人原來係敗犬女王，一個唔該就因為重遇舊愛而棄暗投明，我真係接受唔到。等於我地果一代男人好難接受酒井原來誤入歧途一樣。
如果你話俾我知戲裡面既邪惡集團，出動只能夠係地球停轉日用完用剩果D納米蟲，你不如將侏羅紀公園用剩既恐龍、King Kong用過果隻大猩猩攞埋出嚟啦笨！
我細個果陣見既毒蛇黨（即係呢套戲既邪惡軍火集團既前身）果D統治世界既陰謀勁好多，包括：
- 呢全世界電子儀器失靈既裝置
- 控制天氣既科技
- 製造大海嘯既裝置
- 用歷代軍事強人既DNA合成一個新既領導人（不過採集孫子既DNA既時候，應該係收集咗A貨，所以謀略一般）
不過話時話，毒蛇黨最水皮果兩個陰謀，反而有人造咗：
- 製造有毒既食品同牙膏，不知不覺間毒害全世界 － 中國既企業做緊
- 打劫美國聯邦儲備 － 果班banker用次按、CDO, CDS做咗
講到尾，入場睇果陣本來冇乜期望，不過都真係幾失望。唯一比較「忠於原著」既係個故事公式，邪惡集團一定係捉咗其中一個主角，然後又唔覺意俾個主角通知到總部，於是大軍一面殺過去個秘密基地，另一面就係個主角響基地裡面好似李小龍打死亡塔咁打，最後邪惡集團既邪惡計劃功敗垂成。
不過，有D政治訊息，可以穿鑿附會咁提一提。
話說幾支納米蟲飛彈發射咗，跟住忍者Snake Eye用地對空擊落第一支飛彈，果支就係飛去北京果支！呢D就叫大國崛起喇，連西片都唔想傷害中國人民感情！萬一支飛彈打中北京，分解咗個鳥好點算？一吓唔覺意有D豆腐渣工程，分解唔到咁咪好尷尬？
至於我地既鄰居日本就慘好喇，個小朋友唔講英文俾師父鬧... 仲有，果幾支飛彈，竟然冇一支係射東京既... 真係連毒蛇黨都唔放日本在眼內...
最後，果個俾人換咗既A貨美國總統，仲唔係小布殊？唔怪得之佢攪到班軍火商咁發啦。好彩之後選過第二個，Change. Yes, we can!
延伸閱讀：
G.I.Joe雜憶 (冇人睇冇人留言既舊文)
老餅回憶 - 義勇群英 G.I.Joe (幾年前舊文，內有連結去figure公仔既site)
題外話：
陳維安想講乜呀？佢願意參加驗毒嚟支持D學生？答佢果個學生答得幾好－－「就算校長同老師都加入驗毒都冇用」
私隱專員公署剛剛提出意見，話除非修例，否則監護人冇權代未成年學生決定俾人收取身體樣本。
我想問，咁即係點呀？黃仁龍係律政司司長噃，D法律問題未攪清楚既咩？
Recent Comments