這是我的工作間。

廿一年後的今日，我見到六四的畫面，還是想哭。

民主女神不是用來崇拜的偶像，而是一個象徵，那是我們其中一個悼念六四死難者的象徵。

女神像就好像一個悼念的墓碑。

曾蔭權政府連這個墓碑也容不下，曾蔭權你會落地獄的。就算末世審判時你可以上天堂，我也會在半途攔著你，跟你對質。*

你平時究竟點樣讀聖經？

你究竟有冇廉恥之心？

sorry，我是激動了點。但我想再問你一次，你怎能夠如此厚顏無恥？

* 沒那麼生氣的時候想了又想，最後決定刪去這兩句說話，因為我沒有這個權柄審判他。

盆景貓事件，本來就係一班不求甚解*既人既小風波。不過唔知點解連政黨都加入抽水，咁就真係唔講唔得。

所謂既盆景貓，係一個n年前既一個網絡事件，當時外國有人貼咗張相出嚟，話可以用頗殘忍既方法塞隻貓入個樽入面，呢個玩笑開得太迫真，引起咗公眾關注，後來傳媒查證咗係惡作劇，件事就完咗。

有個藝人第二代響新浪微博話自己訂咗隻盆景貓，其他藝人見到，愛貓心切，於是響微博聲討呢位第二代。出事果張相都算係迫真，一眾愛貓藝人誤會其實都情有可原。不過奇就奇在件事愈攪愈大，娛記仲周圍去問其他藝人點睇，班人於是繼續聲討，又話要阿邊個好好教女咁。於是乎連續幾日娛樂版都係呢單野。

藝人工作忙碌，唔知單野係開玩笑就話啫，班娛記話晒都係記者，應該有Ｄ常識同責任心，冇可能攪咗幾日都查唔到張相係開玩笑，仲走去四圍撩班藝人打落水狗，成件事就咁反智地繼續滾落去。

好喇，就當Ｄ娛記係無知或者無良是旦一樣，呢件事根本唔值得浪費個BLOG嚟講。

不過，世事真係無奇不有，自由黨竟然公開「強烈譴責」呢位第二代！唔知我仲以為佢入咗阿爾蓋達...

根據報導，自由黨裡面有個寵物權益關注組，公開指責佢「變相鼓吹虐待待動物風氣，要求她盡快就事件向公眾道歉」。

藝人不求甚解*，情有可原；

娛記不求甚解，都情有可原；

但係呢個自由黨係政黨嚟架，仲要係號稱代表工商界同專業人士既政黨嚟架，究竟佢地知唔知自己做緊咩？

老實講，我唔明點解d人會窮追猛打要阿邊個道歉。個情況就等於你講咗個n年前好多人講過既虛構鬼故，有人聽到覺得恐怖，你需唔需要道歉？

要道歉既話，頂多係為貼出一張低級趣味既相，引起不明真相既人士不安而道歉。至於咩「變相鼓吹虐待待動物風氣」，大佬呀，全世界都知道張相係Photoshop整出嚟架，你會唔會見到有張咁既相真係塞隻貓入個樽度？咁同中聯辦同埋土共屈五區公投係分裂國家有咩分別？都係「變相鼓吹」嘛！

不如咁啦，自由黨響功能組別仲有票，響行政會議同問責局裡面又有位，不如提出個《禁止Photoshop虐貓法案》，提交立法會通過啦，以後PS惡攪盆景貓貓狗狗都當涉嫌「變相鼓吹虐待待動物風氣」，罰款兼坐監吧。

*後記:

回應留言的時候, 我想到了, 對於我來說, 當我知道那些照片是假的, 就是end of story。之後的窮追猛打, 於我而言就好像不求甚解的追殺。當然, 不排除很多愛貓人士即使知道是假的，也不能接受那照片。

自由黨的「強烈譴責」效果特強。可能我不是愛貓人士, 對於愛貓者來說可能連PS(或者是就位拍攝)的圖也不能接受。對我而言, 那是低級趣味, 但要勞煩堂堂政黨出個「強烈譴責」, 那大概喜劇效果大於警世效果。

我也想過是否在這裡貼一張來表達對於那些人窮追猛打那唐小姐的表態。不過因為覺得圖片太低級趣味, 所以只貼了百度的條目連結便算。

延伸閱讀： 

自由黨強烈譴責鼓吹虐畜 唐貝詩心有不甘未肯道歉 - Yahoo! 新聞

百度百科 - 盆景貓